Тхьаумаф, Мэлылъфэгъум и 29 2018 16:47

Тыгъужъыкъо Къызбэч исаугъэт Афыпсыпэ къыщызэIуахыгъ

Мыекъуапэ, мэлылъфэгъум и 28

Адыгэ лъэпкъым илIыхъужъэу, дзэ пэщэ цIэрыIоу Тыгъужъыкъо Къызбэч исаугъэт къуаджэу Афыпсыпэ къыщызэIуахыгъ. Къызбэч шапсыгъэ пщы лIакъоу ШэрэлIыкъохэм ащыщыгъ. I777 илъэсым псыхъоу Адагум дэжь щыIэгъэ къуаджэ къыщыхъугъ. Онэгум имыкIэу ШэрэлIыкъо Къызбэч Тыгъужъ ыкъор лъэпкъ шъхьафитныгъэм фэбэнагъ. "Черкесием иаслъанкIэ" еджэщтыгъэх.

ШэрэлIыкъо Къызбэч дзэ пэщэ зэкъуагъэп, апэ итэу заощтыгъэ. Нэбгырэ 700 нахь зыхэмыт шапсыгъэ дзэм ипащэу урысыдзэу мин пчъагъэ хъурэм I834 текIуагъэу тарихъым къыхэнагъ. УIэгъэ пчъагъэ телъыгъ, зы уIагъэр кIыжьынэу игъо имыфэзэ онэгум итысхьэщти, зэуапIэм Iухьажьыщтыгъ.

I840 илъэсым уIагъэу тещагъэхэм апкъ къикIэу Тыгъужъыкъо Къызбэч дунаим ехыжьыгъ. Ащ илIыгъэ пщыналъэхэм къахэнагъ.

Кавказ заом илъэхъан Черкесием ишъхьафитныгъэ фэбэнагъэ дзэ пащэм исаугъэт джы Афыпсыпэ дэт. Псыхъоу Убын Афыпс зыщыхэлъэдэжьрэм дэжь Тыгъужъыкъо Къызбэч пыим щыпэуцужьыгъагъ. Арышъ, лъэпкъ лIыхъужъым исаугъэт пае Афыпсыпэ къыхахыгъ.

ШэрэлIыкъо Къызбэч исурэтэу зы къытэнэсыжьыгъ. Инджылызым щыщэу Кавказ заом хэтыгъэ Джеймс Белл ар ышIыгъагъ. ШхоIур ыIыгъэу Тыгъужъыкъо Къызбэч ащ ит, Афыпсыпэ щагъэуцугъэ саугъэтыр ащ тырахыгъ.

 

qizbech2

 

qizbech3

 

Еджагъэх 173 фэдизэрэ

1 Комментарий

  • Комментировать rahmi özkaya Тхьаумаф, Мэлылъфэгъум и 29 2018 19:34 написал rahmi özkaya

    ADIĞEXER ARI VO BO T'HAĞEPESOV...************!

Комментарий къытфэтх

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.